6 mánaða!

Í dag eru sex mánuðir síðan ég með jóga ró og rembingi kom Bjarna Jóhanni í heiminn og leit í fyrsta sinn í fallegu brúnu augun hans....  Þá vó hann rúm 4 kíló og var 53 cm langur. Nú hálfu ári og óteljandi brjóstagjöfum síðar er hann orðinn 8,9 kg og 71,5cm. Litla sponsið er nú orðið að yndislegum þrítenntum öskurapa sem bræðir mann algjörlega með yndislega brosinu sínu. Hér eru nokkrar myndir og myndbönd af kappanum í tilefni dagsins.

Bjarni Jóhann með fyrsta bílinn sinn sem hann fékk í "afmælisgjöf" frá mömmu sinni og pabba. Hann er ánægðari með bílinn en þessi mynd gefur til kynna (var alveg furðulostinn yfir aðförum mömmu sinnar við að ná þessari mynd og mátti ekkert vera að því að brosa þrátt fyrir ítrekaðar tilraunir mömmu hans )...

...og eins og hér sést veit hann strax til hvers bílar eru...

Þennan fína bolta fékk hann sendan frá góðu fólki á Írlandi og er alsæll með þetta skemmtilega leikfang sem fyrir utan að velta og rúlla svona skemmtilega er með voða spennandi miða fastan á sér sem mjög gott er að naga... svo er hann líka merktur "rétta" liðinu...

Nýjustu hljóðin eru öskur á háa-c-inu og það sem mamma hans kallar "þögla ópið". Hér er hann að leika sér í hoppukastalanum og það er engu líkara en að honum bregði illilega við þá sjón sem mætir honum í speglinum...

Og að lokum er hér ein mynd af tönnslunum í neðri góm. Þeir sem reynt hafa að taka mynd af tönnum í ungabarni skilja af hverju myndgæðin eru ekki betri

Athugasemdir

[Bjorgen-kjorgen (IP-tala skráð) 30.11.2008 kl. 00:12]

Líkar við þögla ópið :) Og rosalega er hann duglegur með bílinn!! Þarf greinilega ekki að kenna drengnum réttu handtökin :)

[Magnea (IP-tala skráð) 1.12.2008 kl. 00:19]

Þetta með dótið er ábyggilega i genunum, svo er þetta líka svo flottur bíll :)

Og mikið eru þetta fallegar og beittar tennur

Bestu kveðjur

Magnea 

[Stefán Hermannsson (IP-tala skráð) 1.12.2008 kl. 13:19]

Ekki vantar nú prinsinn söngröddina. Ég þekki nokkra frækna frændur piltsins

sem fengu sér oftast nokkur glös áður en þeir brustu í söng við misjafnan

fögnuð áheyranda. Sá litli þarf þess greinilega ekki.

                                                                         Kveðja S.B.H.

[Halldór (IP-tala skráð) 3.12.2008 kl. 01:33]

Já, það verður heldur betur gaman þegar sá litli mun taka undir með frændum sínum á næsta ættarmóti. Það verður þó líklega einhver bið á að hann yfirgnæfi þá, enda tístið, enn sem komið er, heldur veiklulegt í samanburði við drunurnar sem berast úr börkum frændanna! Annars er náttúrulega fátt sem jafnast á við undurfagran flutning norðanmanna á ´Undir bláhimni...´ 

[Svava S. Steinars, 8.12.2008 kl. 11:19]

Heheh, greinilegt að það er í genunum hvernig á að leika sér að bílum !  Einhver stökkbreyting sem hefur komið inn í stofninn í upphafi síðustu aldar   Held að hann hafi annars snúið speglinum frá sér þar sem maður bara þolir ekki nema smá tíma af slíkri fullkomnun í einu, fær hreinlega ofbirtu í augun af fegurð