Spiladagur

Hinn árlegi spilahittingur í "hinum" spilaklúbbnum mínum var um daginn, hér hjá okkur. Það var mikið fjör og mikið gaman eins og ætíð, þó með nýju sniði núna þar sem tveir einstaklingar í klúbbnum hafa skipt sér í tvennt síðan síðast var spilað og litlu sprotarnir tveir voru núna með í fyrsta skipti utan bumbu.

Það þurfti að sinna ýmsu öðru en spilamennsku en þrátt fyrir það tókst okkur að spila bæði smá af Ticket to ride og svo eitt "lítið" Carcassonne" (grunnspil + 2 viðbætur). Og raða í okkur veitingum náttúrulega, ekki má gleyma því!

Börnin léku sér á gólfinu á meðan fullorðna fólkið lék sér við eldhúsborðið. Guðrún Helga fékk svo að prófa hoppukastalann og fannst hann bara mjög skemmtilegur. Bjarni Jóhann leiðbeindi henni aðeins fyrst enda þaulvanur þessu apparati.

Tveir sætir. Þeir eru nú pínu líkir feðgarnir... há kollvik, bollukinnar, hökuskarð og undirhaka... eru þetta ekki norðlensku genin, þið norðanfólk?

Það er nú pínu svipur með þessum tveim líka... Bobbi og Guðrún Helga gera sig klár til að yfirgefa gleðskapinn...

... en fyrst þurftu pabbarnir aðeins að leika sér smá með... nei afsakið, ég meina við börnin...

... sem fannst það hreint ekki leiðinlegt!

Athugasemdir

[Hanna F. Stefánsdóttir (IP-tala skráð) 7.2.2009 kl. 16:26]

Flottar myndir. Já útlitseinkennin Helga mín hmmmm..... Bollukinnar, hökuskarð og há kollvik (eða stækkandi enni) finnast á mörgum norðanmönnum! Undirhakan er víst líka til þótt maður sé ekki alveg tilbúin að samþykkja hana sem ættareinkenni Bestu kveðjur til ykkar

[Stefán Hermannsson (IP-tala skráð) 13.2.2009 kl. 01:12]

Útlitsmunurinn á þeim feðgum er aðallega sá að sá yngri er ekki enn orðinn jafn skeggjaður og pabbinn.

[Svava S. Steinars, 16.2.2009 kl. 14:24]

Mig langar að ÉTA þessi litlu kríli, þau eru svo sæt !

[Helga Guðrún og Halldór Pálmar, 16.2.2009 kl. 19:45]

Svava, börn eru ekki matur, ekki einu sinni í krepputíð!!

Og já, þeir eru alveg jafn sætir, þessi með skeggið og hinn sem er skegglaus